Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva və Bakı Media Mərkəzinin rəhbəri Arzu Əliyeva iyunun 23-də Altıağac Milli Parkının ərazisində yerləşən, layihələndirilməsi və tikintisi “ArchiCO Engineering Company” yə məxsus Vəhşi Heyvanlar üçün Reabilitasiya Mərkəzinin yenidən qurulmasının təməlqoyma mərasimində iştirak ediblər. Mərkəzdə görüləcək işlər barədə Leyla və Arzu Əliyevalara “Archico” MMC-nin texniki şöbəsinin rəhbəri Vüqar Kərimov məlumat verib. 2.6 hektar ərazini əhatə edən layihənin məqsədi reabilitasiyaya ehtiyacı olan vəhşi heyvanların, xüsusilə də ayıların təbii yaşam mühitinə qaytarılması üçün zəruri şəraitin yaradılmasıdır. Layihələndirmə zamanı ərazinin relyefi və mövcud yaşıllıq nəzərə alınmaqla, mərkəzdə reabilitasiya klinikası, təsərrüfat binası, fauna haqqında məlumat mərkəzi və kafenin tikintisi nəzərdə tutulub. Bu layihə təbiətin mühafizəsi və vəhşi fauna nümayəndələrinin qorunaraq təbii mühitə qaytarılması baxımından böyük əhəmiyyət daşıyır. Xatırladaq ki, şirkətimiz 2021-ci ildə Bakı Zooloji Parkının yenidən qurulması layihəsini müasir standartlara uyğun olaraq uğurla tamamlamışdır.